Studium oder nid…
Min liebevolle, barmhärzige Papi
Du weisch, we lang i scho am Überlege bi, ob i doch nomol es Studium mache söll und Theologie studiere. Im Juni han i mer grosszügig e Frist bis Wiehnachte gsetzt. Jetzt chömmed die immer nöcher und i weiss no immer nid wie i mi entscheide söll…
Es Studium wähle heisst, mini Wohnig ufgeh, en Job sueche wo i mit wenig schaffe doch gnueg verdien, demit i mers Studium finanziere chann, no wiiter weg vo minere Freiwiligearbet lebe, wo mer so am Herze liit und evtl. sogar mini Freiwilligearbet reduziere oder ganz ufgeh…
Doch trotz all dem wo degege spricht gits au gnueg, wo defür spricht: vor allem mis Härz und d’Usage vo Lüüt, wo mini Talent gsehnd und dene ich vertraue. Da mini Situation bi de Arbet scho länger total unbefriedigend isch und i jetzt ab em Januar 45h zum gliche Lohn schaffe dörf, wer jetzt grad de richtig Ziitpunkt zum s wooge.
Ich bitte dich hilf mir di richtig Entscheidig z’fälle. I möcht, dass DIN Wille gscheh chann (nid min Wille). Falls es din Wille isch, dass i es Studium mach, hilf mer au e passendi Arbetsstell z’finde. I vertraue druf, dass du mi uf de richtig Weg führsch, so dass i am 23. Dezember 2016 mim geistliche Begleiter di richtig Antwort geh chann.
Amen