Sehnsucht…
Min liäbevolle und barmhärzige Papi
Dankä für das für mi sehr a d’Substanz gehendi Gspröch, wo i hüt mit mim geistliche Begleiter han dörfe führe oder besser usdruckt: wo er uf min Brief hi mit mir gführt het. Es isch für mi nid eifach gsi, da i i dem Brief ihm schonigslos mis ganze Innere usbreitet han und debi fascht kein Abgrund verschwiege han… Für mi isch da Gspröch aber mega wichtig gsi, denn so es Gspröch isch nur möglich gsi, wil ich ihm vertraue, was bi mir alles andere we selbstverständlich isch. Danke, dass i vo ihm und au no wiitere Persone so sehr im Gebet aber au immer wieder face to face unterstützt wird.
Min liäbevolle und barmherzige Papi, i bitte dich inständig:
– Hilf du mir Läbe z’WÖLLE!
– Hilf du mir JO zum Läbä z’sägä und nid immer nur vom Vertrag bis zum 10. November z’rede!
– …
– Hilf du mir Jo zu mir z’sägä!
– Lehr du mi, mi nid z’hasse!
– Lehr du mi, mi selber az’neh!
– …
– Hilf du mir z’erkenne für was i würkli dankbar bi!
– Hilf du mir min Blick ufs Positive z’lenke und mi a dem z’erfreue!
– …
– Heil du mini Chrankheit!
– Zeig du mir en Sinn i minere Not!
– Zeig du mir de Weg us em Sumpf! I cha mi nid selber usezieh… Aber i möchte min Teil dezue biträge.
– Zeig du mir de Weg wo du mi hieführe möchtsch! I möcht so gern erkenne wo mini Reis higoh söll!
– …
– Loh du mi mini Prüefige bestoh!
– Bewahr mi vor emene erneute Blackout!
– Hilf du mir mis Bruefsziel z’erreiche und guet drin z’si!
– …
– Loh mi bitte dini Gegewart immer wieder gspühre! I sehne mi so sehr noch dir…
– Hilf du mir uf di z’vertraue!
– Stärk du min Glaube!
– Stärk du mi, so dass i irgendwänn echt sie chann und mini Maske ablege!
– …
– Unterstütz du mi, dass i treu im Gebät bi.
– …
Min liäbevolle, barmherzige Papi, i weiss mini Bitte sind unerschöpflich, doch sie sind au Usdruck vo miner Not, dass i nüm würkli wiiter weiss und voll und ganz uf dich agwiise bi. I de Bible stoht «für Gott ist nichts unmöglich». En grosse Teil vo miner Hoffnig setz i i di, denn wenn du mir nid helfe chasch, wer sölls denn schaffe??? I möchte sehr gern druf vertraue, dass du en Plan für mi hesch und mi heile wetsch und dass du mi führsch… I will mis Läbä würkli so gern dir schenke und druf vertraue, dass du demit öpis gschiits afange chasch… Doch i bi eifach unfähig… i verzwiifle a mir… Bitte hilf du mir!!!
Min liäbevolle, barmherzige Papi, i möcht di au für mini Vertrauenspersone bitte:
– Schenk ihne immer wieder neui Chraft!
– Schenk ihne immer wieder vo neuem dini Gegewart!
– Loh sie erkenne, wenns ihne z’viel wird mit mir, denn i möcht sie eigentlich nur sehr ungern mit minere Not belaste… Doch sie sind für mi so wichtigi Stützene…
Amen