Reha
Min liebevolle, barmherzige Papi
Ich befind mi zur Ziit z’Davos i de Reha. S’Ziel wär, dass sich mini Erschöpfig verringeret und es mir physisch und psychisch besser goht. Leider gohts mir aber immer schlechter… Das hangt unter anderem au mit minere neue Zimmergenossin zämä. Sie schnarcht so stark, dass i kas Aug zuetue, loht im WC immer die leer WC-Rolle zrugg, weigeret sich bim spiele uf em Handy de Ton abz’stelle, isch oft luutstark am Telefoniere (uf Spanisch), verstoht chum düütsch, macht min Vorhang wo i zoge han um en chline Rückzugsort z’ha immer uf…
Min liebä barmhärzige Papi
Ich danke dir, dass i d’Chance han chönne nutze und JO zur Reha gseit han. Ich danke dir, dass i a Sport immer chli meh Freud becho han und sogar freiwillig no s’MTT dezue gno han. Danke für die paar liebe Lüüt, wo i i der Reha han dörfe kennelerne. Danke für die wunderschön Landschaft. Danke für s’guete Esse. Danke für die liebe Therapeute und Pflegepersone. Danke, dass i Lüüt han uf die immer zelle dorf, au jetzt i de Reha wenn i am verzwiifle bin. Danke, dass i han chönne min Wohnigsvertrag, mini Wohnigskündigung und mini Studiumsameldige abschicke.
Ich möcht di für mini Reha bitte, zeig mir, obs sinnvoll isch die Reha bis zum Schluss durez’ie. Befrei mi vo mine Selbstmordgedanke. Befrei mi vo mine Minderwertigkeitsgfühl. Befrei mi vo mim Narzissmus. Hilf mir es bessers Selbstbild, es bessers Selbstwertgfühl z’ha. Hilf mir Kränkige besser z’erträge. Schenk mir e dickeri Huut, so dass i nid alles uf mi bezieh. Lehr du mi, dass i mi selber aneh chann und mini Talent gseh und schätze chann. Hilf mir die wenige Nächt im Besprechigsruum guet z’nutze. Sorg du für e langfristigi Lösig, so dass i guet schlofe chann und nid durs Geschnarche gweckt wird. Hilf mir die Reha so guet wes mir irgendwie möglich isch z’nutze. Hilf mir uf min Körper z’lose und min Durchhaltewille z’überwinde, wenns eifach nümm goht das z’akzeptiere. Schenk mir Geduld und Verständnis für mini Zimmernochberi. Schenk mir i de Arztvisite di richtige Wort.
Min liäbevolle, barmherzige Papi
Ich will nid immer nur bitte sondern dir danke ganz noch minere Ufgob „anstatt immer überall das Negative suchen/vermuten, Gott für das Positive danken“. Doch leider glingt mir das no immer nid ganz. Bitte unterstütz mi au i dere Ufgob.
Amen